Fartøya skal nyttast til å legge beskyttande stein over kablar og strukturar på havbotnen på djupner ned til 600 meter.

- Dette er ein viktig kontrakt for Power & Control-området, som frå før har solid erfaring innan offshoresegmentet, men som med denne kontrakten kjem inn på eit nytt segment. Dette viser at løysingane er konkurransedyktige og fleksible. Det er svært gledeleg  å få denne kontrakten i ein vanskeleg marknad,  seier konsernsjef Gunvor Ulstein i Ulstein Group. Ho legg til at Ulstein Group nyleg har levert design og løysingar til denne typen skip.

Leveransen frå Ulstein Power & Control inkluderer Power-pakka (den elektriske pakka) som inneheld generatorar, tavler, motorkontrollsenter, thrustermotorar og frekvensomformarar, automasjonssystemet ULSTEIN IAS®, DP-system og kontrollsystemet til thruster, og dessutan arbeidet med å starte opp systema.

Systemintegrasjon
Det blir stilt store krav til systemintegrasjon for å kunne sette saman og levere slike produktpakkar, og administrerande direktør Gunnar H Hide i Ulstein Power & Control kommenterer kontrakten slik:

- Løysingane og produkta i ein systempakke skal vere sikre, miljøvenlege og kostnadseffektive. Med ein felles innsats frå hovudkontoret i Noreg og selskapet vår i Kina, greidde vi å vinne kontrakten ut frå ei totalvurdering av pris, leveringstid, funksjonalitet og kvalitet på systema. Vi er svært takksame for tilliten frå AVIC Weihai Shipyard og Jan De Nul Group, seier han.

Ulstein skal levere produkta og systema i 2016. Skipa skal leverast frå verftet i 2017. Dei måler 95 meter i lengda og 22 meter i breidda.

Jan De Nul Group, med hovudsete i Luxemburg, er ein ekspert på mudring og marin anleggsverksemd, og i spesialiserte tenester til offshoreindustrien.

AVIC Weihai Shipyard Co Ltd ligg i Shandong-provinsen i Kina. Verftet vart etablert i 1951, og starta med å byggje fartøy til den internasjonale marknaden i 1998.

Ulstein Group er eit konsern med fleire maritime bedrifter med hovudvekt på skipsdesign og maritime løysingar, skipsbygging, kraft- og kontrollsystem og shippinginteresser.